查詢方式說明

查詢類型

用臺灣閩南語查詞目

會用得輸入臺灣閩南語漢字、臺羅正式版抑是數字版查，查著的結果分做兩部份：

1. 完全符合：出現「與輸入字串完全符合的詞目」
2. 部份符合：出現「不完全與輸入字串符合，但漢字、臺羅，或近、反義詞中有包含輸入字串的詞目」

可比：輸入「袂使」、「bē-sái」或「be7-sai2」，會用得查著

1. 完全符合有「袂使 bē-sái」一條詞目
2. 部份符合有「袂用得 bē-īng-tit」、「袂使得 bē-sái-tit」、「袂當 bē-tàng」等詞目

另外，也會用得配合使用正規表達式查，簡單說明如下，詳細說明見下方「附件：正規表達式說明」。

用臺灣閩南語查例句

會用得輸入臺灣閩南語漢字、臺羅正式版抑是數字版查，查包含這字、詞抑是詞組的例句。

可比：輸入「bē-tio̍h」或者「bē tio̍h」，會用得查著

1. 伊磕袂著就欲罵人。
   I kha̍p-bē-tio̍h tō beh mē--lâng.
2. 伊驚見赴袂著車幫，下性命走。
   I kiann-kìnn hù bē tio̍h tshia-pang, hē-sènn-miā tsáu.

等等的例句，其中無論「bē」、「tio̍h」屬佇仝一个詞（kha̍p-bē-tio̍h）內底，抑是是兩个詞的詞組（bē tio̍h），攏會出現佇查詢的結果。

用華語查全文

輸入華語，查詢的結果分為兩部分：

1. 完全符合：出現「對應華語與輸入字串完全符合的詞目」
2. 部分符合：出現「對應華語或義項、例句中有包含輸入字串的詞目」

可比：輸入「煮飯」會用得查著

1. 完全符合有「煮食 tsú-tsia̍h」一條詞目
2. 部份符合有「燃火 hiânn-hué」、「鼎疕 tiánn-phí」、「飯坩 pn̄g-khann」等等的詞目

用華語查例句

查詢包含這个華語的例句。

可比：輸入「可是」，會用得查著

1. 我是共阮娘仔惜命命。
   Guá sī kā guán niû-á sioh-miā-miā.
   (我可是非常疼愛我妻子的。)
2. 我想欲共伊講心內話，毋過，見擺看著伊就講袂出喙。
   Guá siūnn-beh kā i kóng sim-lāi-uē, m̄-koh, kiàn-pái khuànn-tio̍h i tō kóng bē tshut tshuì.
   (我想要跟他說真心話，可是，每次見到他就說不出口。)

等等的例句。

語音輸入查詢（限定掛「用臺灣閩南語查詞目」來使用）

使用的步驟：

1. 揀「用臺灣閩南語查詞目」，佇查詢欄正手爿點mài-khù的符號。
2. 頭遍使用的時，瀏覽器可能會跳「請求使用麥克風」的對話框出來，才點「允許」。
3. 點「開始錄音」，講想欲查詢的詞語了後，點「結束錄音」。
4. 顯示音讀佮所輸入語音相倚的詞目，結果列表排序按照辨識系統判斷相倚的程度，較接近的優先顯示。

查詢結果列表排序

查詢結果列表按照下底的群組排序：

1. 主詞目
2. 單字不成詞者
3. 臺華共同詞
4. 附錄資料中的詞目
5. 附錄資料俗諺

各群組內部按照臺羅abcd...排序，仝聲韻字才閣按照聲調第1聲到第8聲的順序排列。聲調若猶是仝款，照第2字排列。

附件：正規表達式說明

本辭典使用Python正規表達式，查詢欄位是詞目漢字佮臺羅數字版。

臺羅拼音查詢注意事項

比對的對象是臺羅數字版，第1、4聲也必須完整寫出來（如：sai1、iat4）。使用正規表達式查詢的時，若需要佇表達式內底包含彼个音節的後尾，就必須共聲調數字包含在內。

• 例：用「iat4$」查詢結尾是iat的詞，因為有使用「$」表達規个詞的結尾，因此必須寫出「4」才會用得正確查詢。若輸入「iat$」就會查無結果。
• • 例：用「^ti1 .+」查詢首字是「ti」，後面有其他音節的詞，因為有使用空白來表達「ti1」這个音節的結尾，因此必須寫出「1」才會用得正確查詢。若是輸入「^ti .+」就會查無結果。

為著避免佇一般查詢的時，因為連字符的差異造成查無結果，比對的臺羅數字版共所有連字符攏替換做空白。因此，用正規表達式查詢的時，音節之間必須是空白，袂用得用連字符。

• 例：用「h(ue|e)2 tshia」會用得查著「hué-tshia」、「hé-tshia」。若是輸入「h(ue|e)2-tshia」就會查無結果。

符號說明

這搭介紹常用的特殊符號佮辭典查詢情境，完整的符號說明請參考Python正規表達式文件。

【.】：代表有一个任何的字元。

輸入「袂.得」，查詢「袂」、「得」兩字中間有任何一个字元的詞目，可比「袂用得」、「袂堪得」、「痚呴袂忍得嗽。」

【^】：囥佇表達式的開頭，查詢以此開頭的字詞。

輸入「^食」，會用得查著「食」、「食物」、「食品」、「食暗」；輸入「^phin」會用得查著「phín」、「phìng-kim」、「phīnn-á」。

【$】：囥佇表達式的結尾，查詢以此結尾的字詞。

輸入「尾$」會用得查著「後尾」、「菜尾」、「躡跤尾」；輸入「iat4$」會用得查著「phiat」、「oo-pe̍h-tshiat」、「phah-tsiat」。

【[ ]】：比對符合月眉號內底表達式的任何1个字元。

有下底幾種用法：

1.直接指定月眉號內底的字元。

輸入「^si[aptk][14]$」會用得查著「sia」、「sip」、「sit」、「sik」，聲調是第1聲抑是第4聲，毋過查袂著「siap」、「siak」、「siat」。

2.月眉號內底的字元用範圍表示，可比[a-z]、[1-9]。

輸入「^pa[1-9]$」會用得查著「pa」、「pá」、「pà」、「pâ」、「pā」。[1-9] 也會當用 [\d] （代表0~9任何一个數字字元）替代。

3.用^排除指定的字元。

輸入「[^pb]uat」，會用得查著「gua̍t」、「bô-huat」、「pì-kuat」，毋過查袂著「pua̍t-á」、「bua̍t」。

4.用^排除特定範圍的字元。

輸入「[^a-z]hian」，會用得查著「a-hiann」、「bîng-hián」、「hiáng」，毋過查袂著「phiàn」、「khián」、「tshiâng」等等h頭前猶閣有其他字母的組合。

【(A|B)】：同時查AB兩種字串，可比講無仝腔口的音讀。

輸入「h(ue|e)2 tshia」，會用得查著「hué-tshia」、「hé-tshia」。

注意：「|」符號，若是用佇前一項的「[ ]」內底，是代表「|」字元本身，無特殊意義，佇辭典內底會查無。

【?】：頭前的表達式無出現過抑是出現過1改。

輸入「蒜仔?」，會用得查著「蒜」、「蒜仔」、「蒜仔花」、「蒜茸」；輸入「tsah?[34]」，會用得查著「tsà」、「tsah」。前一項的見本也會當用「hu?e2 tshia 」來查。

注意：這个符號作用範圍是前一个表達式，若無使用月眉號，是代表前1个字元無出現過抑是出現過1改。

【*】：頭前的表達式無出現過抑是出現過1改以上。

常用的用法是用.*代表有一个以上的任何字元或者是無任何字元。輸入「.*飯$」，會用得查著「滷肉飯」、「凊飯」、「飯」等等。

注意：這个符號作用範圍是前一个表達式，若無使用月眉號，是代表前1个字元無出現過抑是出現過1改以上。

【\1 \2】：配合用月眉號「()」框起來的範圍，比對有重複的內容。

輸入「紅(.)\1」，\1代代表第一个月眉號(.)比對著的部份（凊彩一个字元），會用得查著「ABB」的組合，可比「紅記記」、「紅絳絳」等等。

輸入「(.)\1(.)\2」，會用得查著「AABB」構詞的詞目；輸入「(.)(.)\1\2」會用得查著「ABAB」構詞的詞目。