本辭典提供詞目的聲音檔，方便逐家來學習。音檔按照下底的原則：
音檔位置
本辭典的詞目、例句提供音檔，放送的圖示下佇羅馬字的正手爿。
錄音原則
發音以辭典的主音讀佮通行腔為標準，各種異讀、方言差異暫時無提供音檔。本辭典主音讀佮通行腔的選定原則，詳見「臺羅說明」。
單音詞錄音原則
若是單字詞，就算彼个單字詞佇口語袂出現本調的形式，為著避免造成學習的困擾，攏錄本調，可比「佇(tī)」、「閣(koh)」等等。
複音詞錄音原則
- 臺灣閩南語方言差異的類型，陽平調變調有變做中平調佮變做低調的差別，本辭典的主音讀高雄音屬偏漳腔，多數陽平變調是變做中平調。毋過部分1詞目佇競爭了後，變做低調的讀法顛倒變做優勢音。為著會當反應實際的語音，這寡詞彙猶原錄低調。可比「而且(jî-tshiánn)」的「而」、「膀胱(phông-kong)」的「膀」，變調攏讀做低調。
- 複音詞內底，若有一字會當變調會當無變調，照彼个詞語用的情形，取其中一種方式呼音。可比跤尖手幼(kha-tsiam-tshiú-iù)」的「跤(kha)」與「手(tshiú)」，同時存在變調佮無變調兩種讀法，取變調的讀法。
- 部分詞目，若出現佇句中，尾字按照一般變調的規則；若是出現佇語氣完結的時，尾字輕讀。這類的詞，辭典的音讀標注保留伊較基本的形式，無標做輕讀，干焦佇釋義內容中說明輕讀的情形。錄音的時當做單獨使用彼个詞彙，語氣已經完結，所致尾字輕讀。可比「會用得(ē-īng--tit)」、「拄著(tú--tio̍h)」等等。
ian、iat韻母
韻母ian抑是iat的字，佇口語當中有一部分人共介音i省略讀做/en/佮/et/，毋過這个音節的簡化形式並無全面普及，猶閣有誠濟人保留介音i，毋才錄的音檔猶原讀無省略介音的/ian/佮/iat/。
錄音團隊
發音：王秀容、林月娥、林良儒、林淑期
審聽：許嘉勇、黃文俊、劉明新、盧廣誠
(按照名姓的筆劃、筆順)