編輯體例

本辭典編輯體例分做總例佮分例。總例大概說明每一欄位資料的性質；分例內底才閣詳細說明每一欄位資料所根據的原則。

總例

本辭典所收的詞目，包括詞目、音讀、又唸作、合音唸作、俗唸作、釋義、近義、反義、又見音、分類、附錄、部首筆畫、語音差異、詞彙比較、異用字等欄位，若無資料的時，彼个欄位就規欄空白。以下就幾个詞目網路呈現的頁面，大概說明每一欄的內容：

分例

詞目欄

本欄收錄本辭典所選定的閩南語詞彙或者是用語。詞目的選錄根據本典〈收詞原則〉，詞目的用字根據本典〈漢字用字原則〉。本欄的呈現會用得分做下底幾種狀況：

(一) 複音詞

本辭典收詞以口語通行的多音節詞為主。
可比：【袂使】

(二) 替代字

干焦出現佇單字詞。指彼个詞目的用字毋是本字，干焦是借這字的形抑是音來表示彼个詞，詞目後壁以「[替]」來標示。替代字的說明會用得參考本典〈漢字用字原則〉內底的「替代字說明」。
可比：【一 [替]】tsi̍t

音讀欄

採用教育部公告的「臺灣閩南語羅馬字拼音方案」（簡稱臺羅）標音。本欄收錄詞目的各種音讀，無標實際口語調。

(一) 主音讀

以高雄地區常用、通行者為主音讀。閩南語佇臺灣各地，濟少攏有一寡語音、詞彙的差別，本辭典無呈現所有的音讀，是定出一个「上有代表性的口音」，來成做辭典定音的主體音系，所以選定上接近通行腔的「高雄音」做為主音讀。這段時間也有做過實地的調查，閣再共調查的語料整理了後，具體反映佇定音的過程。
可比：【袂使】 bē-sái

(二) 第二優勢音

以臺北腔為主，以「/」來區隔。臺灣面積無講蓋大，閣再南北二路的交流誠捷，各地頭的口音互相影響誠四常，主音讀以外的腔口眾人凡勢也誠慣勢、也有咧使用，所以佇主音讀以外，同時標記另外一个仝款有優勢地位的「臺北音」，佮主音讀做伙呈現。
可比：【皮鞋】 phuê-ê/phê-uê

(三) 聲音檔

主詞目提供聲音檔，揤音讀邊仔的圖示就會用得線頂播放。詳細請參考〈音檔說明〉。

(四) 文白異讀

「文白異讀」是指一个字佇仝款的反切之下，有「文讀音」佮「白讀音」對立所產生的無仝音讀。文、白讀音的說明如下：

1. 文讀音：根據中古音的反切所讀出來的音，定定用佇書面，有時也出現佇口語裡，佮中古音類的對應較整齊。臺羅的頭前以「[文]」來標示。
2. 白讀音：相對文讀音，通常用佇一般的口語，佮中古音類對應起來會有無仝的語音層次，較複雜。臺羅的頭前以「[白]」來標示。

閩南語文、白異讀的情況誠普遍，兩種音讀攏四常的例袂少，讀音佮語義之間呈現出下底幾種關係：

1. 構詞會當用文讀音也會當用白讀音，而且兩个語義並無精差。
   可比：【用】的文讀音是iōng，白讀音是īng，表示「沒有用」的【無路用】會用得讀 bô lōo-īng 也會用得讀 bô lōo-iōng。
2. 2. 構詞使用文、白無仝音讀的時，造成無仝的語義。
   可比：【大寒】的白讀音 tuā-kuânn 是指「非常寒冷」，文讀音 tāi-hân 是專指「節氣的名稱」，兩个完全袂用得濫濫糝糝。
3. 文、白讀各自有固定的構詞，單字義有可能相仝，構詞了後的音讀就袂用得互相取代矣。通常看款伊是書面語抑是口語詞。
   可比：【流】文讀音 liû，白讀音 lâu，【流汗】讀做 lâu-kuānn 袂讀做 *liû-kuānn，【流浪】讀做 liû-lōng 袂讀做 *lâu-lōng。

假使一个字干焦有一个音，按呢是文白兼用一音，這凡勢是因為伊本來文白音讀就相仝，也有凡勢是文白音內底有一種音讀無去矣。

文讀音、白讀音分別用[文]、[白]標示。

可比：【大】[文] tāi

可比：【大】[白] tuā

又唸作欄

主音讀以外，若有另外一个常用音，以「又唸作」來標注。某一寡詞除了地方腔口的方言差異以外，定定會閣有毋但一種的讀法，可能是「文白異讀」，也有可能是符合語音規則的自然變化。

可比：【貧惰】
又唸作pûn-tuānn、pân-tuānn、pān-tuānn

合音唸作欄

主音讀以外，若有合音的情況，以「合音唸作」來標注伊的合音。一个多音節詞，若符合規律共前字的聲母參後字的韻母敆做單音節，號做「合音」。合音多數是兩字音敆做一个音，也有三字音敆做一个音的例。合音佇閩南語當中誠四常，也算是自然的語音變化之一，並且產生「合音字」，大多數的合音咱攏會用得清楚了解伊的來源，毋過有寡差不多已經完全取代原來的多音節詞，差不多成做一个單音節的「字」矣。不而過，合音字的界線佮用字攏猶閣有誠濟爭議，因此本辭典儘量無使用合音字，多數是收錄彼个來源的詞目，佇文字佮音讀的標示攏使用原本的多音節詞。
可比：【無愛】
合音唸作buaih

俗唸作欄

主音讀以外，若有俗讀的情況，以「俗唸作」來標注俗讀音。相對符合中古反切所切出來的「正音」來講，俗讀音是指照中古反切無可能切會出來的音讀，煞是社會大眾較捷咧講的音。

常見的俗讀音

1. 象 siōng，毋過【印象】讀 ìn-sióng。
2. 觸 tshiok，毋過【接觸】讀 tsiap-sio̍k。
3. 償 siông，毋過【賠償】讀 puê-sióng。
4. 碩 si̍k，毋過【碩士】讀 sik-sū。
5. 仰 gióng ，毋過【信仰】讀 sìn-ióng。

頂頭這寡俗讀音多數是受著字形類化的影響所產生的音讀，這寡詞若是就規範的角度來講，應該標注「正讀音」，毋過顧慮著語言使用的社會性，所致這寡詞也加注「俗讀音」。

釋義欄

(一) 詞性

1. 所標注的詞性包含名詞、代詞、數詞、量詞、時間詞、方位詞、動詞、形容詞、副詞、嘆詞、介詞、連詞、助詞、擬聲詞、擬態詞等等。
2. 除了詞綴以外，其他的詞目攏必須標注詞性。
   可比：【大】
   名詞前綴。用於女子對丈夫之父母的稱呼。可比：大官　ta-kuann(公公)、大家　ta-ke(婆婆)。
   例：【大官】
   [名詞] 公公。指丈夫的父親，用於背稱及描述，面稱時則與丈夫一致。用例：翁婿的老爸，愛稱呼伊大官。Ang-sài ê lāu-pē, ài tshing-hoo i ta-kuann. (丈夫的父親，要稱呼他公公。)
3. 若是彼个詞目有較濟種的語法功能，詞性無固定的時，取伊較常用的狀況來標注，閣再例句內底彼个詞目的使用狀況著愛符合所標注的詞性。
   可比：【歹運】
   [形容詞] 背運、倒楣。運氣不好。用例：阿英仔有夠歹運，見若儉寡錢，人就破病。A-ing--á ū-kàu pháinn-ūn, kiàn-nā khiām kuá tsînn, lâng tō phuà-pēnn.(阿英運氣很差，只要存點錢，就會生病。)
4. 成語、慣用語、俚語、俗語佮諺語等等以「熟語」來標示。
   可比：【尖跤幼手】
   指人手腳細嫩，不適合粗活。用例：伊尖跤幼手，叫伊做這款粗工，伊敢會堪得？I tsiam-kha-iù-tshiú, kiò i tsò tsit khuán tshoo-kang, i kám ē-kham--ti̍t? (他手腳細嫩，叫他做這種粗活，他受得了嗎？)

(二) 義項

1. 第一列佮詞目相對應（指意義相仝），而且佮彼个詞目無仝的華語對譯詞，後壁才閣看款需要加強說明。
   可比：【又閣】
   [副詞] 又、再，表示動作或現象的重複。例……
2. 當當有一个以上的義項，按照義項的常用度來排序，分別用1.、2.、……等數字標佇頭前面。除去本義猶常用的狀況掠外，原則上本義佮引申義無需要分立。
   可比：【袂直】
   1.[動詞] 小題大作，沒完沒了。……
   2.[形容詞] 收支無法平衡。……
3. 單字詞因為文、白讀音的精差，分收做兩條詞目，當當文讀單字詞佮白讀單字詞仝義的時，文讀單字詞的釋義以參見的方式呈現，內文處理做「釋義參見【ｘｘｘ】條」。
   可比：
   【五】 gōo
   1.[數詞] 數字。例：五領衫　gōo niá sann(五件衣服)。
   2.[名詞] 表示數量多或不確定數量。例：五花十色　gōo-hue-tsa̍p-sik(五光十色、各式各樣)、五四三　gōo-sì-sann(有的沒有的事情)。
   【五】 ngóo
   釋義參見【五】gōo條。
4. 一个詞有無仝講法分收做兩條詞目的時，揀其中一條做主撰條，另外一條以互見處理。主撰條列出詳細的釋義，另外一條以「見【XXX】條」呈現。
   可比：【年尾】
   [時間詞] 年終、歲未。
   【冬尾】 殘冬。見【年尾】nî-bué 條。

(三) 用例

1. 用例包含四个部份：漢字、臺羅、音檔佮華語翻譯。
   可比：【袂使得】
   ……用例：這搭的路面頭拄仔才鞏的，你袂使得烏白踏。Tsit tah ê lōo-bīn thâu-tú-á tsiah khōng--ê, lí bē-sái-tit oo-pe̍h ta̍h. (這裡的路面剛剛鋪的，你不可以亂踩。)
2. 用例當中的文句會用得做完整通順的口語句，也會用得做短語、熟語（慣用語、俚語、俗語、諺語）。
   可比：【天公祖】
   ……用例：一个某較好三个天公祖。Tsi̍t ê bóo khah hó sann ê Thinn-kong-tsóo. (一個好老婆勝過三個老天爺保佑。比喻太太至上之意。)
   可比：【食】
   ……用例：食茶　tsia̍h tê(喝茶)、食燒酒　tsia̍h sio-tsiú(喝酒)。
3. 音讀原則上干焦標本調。
   可比：【袂直】
   ……用例：毋拄好共伊挨著，按呢就袂直矣。M̄-tú-hó kā i e--tio̍h, án-ne tō bē-ti̍t--ah. (若不小心碰到他，就沒完沒了了。)
4. 以熟語為用例的時，華語翻譯先譯本義，才閣譯引申義。
   可比：【捒】
   ……用例：順風捒倒牆。Sūn-hong sak-tó tshiûnn.(順著風勢將牆推倒。比喻順著局勢推翻政權或在位的人。)

(四) 近義

收錄佮彼个義項的意義、用法相仝抑是相倚的詞語。
可比：【尖跤幼手】
1.[熟語] 指人手腳細嫩，不適合粗活。近義：跤尖手幼

可比：【中晝】
1.[時間詞] 中午、午時。近義：中晝時、透中晝、正中晝
2.[名詞] 指午餐。近義：中晝飯、中晝頓

(五) 反義

收錄佮彼个義項的意義、用法相對抑是倒反的詞語。
可比：【白話】
1.[名詞] 明白易懂的口語……。反義詞：文言

可比：【人造】
1.[形容詞] 由人工製造而成的。反義詞：天然、自然

(六) 附圖

本辭典為著輔助文字的釋義，部份詞目有佮圖片，向望利用圖片的說明，予讀者閣較清楚了解彼个詞目的內容。特別收錄目前看較袂著的閩南文化特色文物。附圖收錄的體例如下：

1. 圖片的性質：本辭典附圖按照主題來分類，分做單一主題圖佮綜合主題圖。前者以彩色相片表現；後者以手畫的彩圖呈現。
2. 插置的方式：佇釋義義項下底有一个縮圖，點選縮圖就會另外開視窗顯示大圖。
3. 圖說：多詞參見一圖的綜合圖片，佇圖中相對位置才閣加注圖說，以增強說明的效果。
4. 本辭典所收的圖片原則上攏有相對應的詞目釋義，除了綜合主題彩圖有部份因為無相對應的閩南語講法，本文也無收錄，干焦提供華語詞目以幫助讀者了解相對位置。
   可比：【內部器官圖】的〔直腸〕。
5. 組合圖：部份圖片因為說明的需要，收錄兩張照片，並且共兩張照片敆做一張，以增強說明的功能。
   可比：【仙草】收植物佮成品兩張相片。
6. 加注說明：部份圖片有佮加注說明，目的是為著欲物品標示甲閣較清楚。
   可比：【紙錢】收〔金紙〕佮〔銀紙〕兩張相片的組合圖，並且標明佗一个是〔金紙〕佗一个是〔銀紙〕。
7. 箭頭：部份圖片有佮箭頭，明確指示詞目正確的位置。
8. 本辭典所佮的圖片攏有得著作者授權使用，佇咧點選圖片的視窗注記作者的名姓。

又見音欄

會列彼个詞目佇本辭典所收錄的其他音讀，有文讀音、白讀音、俗讀音、替代字音讀數種。
可比：【使】
又見音 使[文]sú、使[白]sài、使[文]sù

分類欄

會列彼个詞目所屬的分類，閣再提供連結，方便查看相關詞目。

可比：【海豬】
分類 動物——魚蝦海獸

附錄欄

會列彼个詞目所屬的附錄，閣再提供連結，方便查看相關詞目。

可比：【玉山】
附錄 地名——山脈

部首筆畫欄

單字詞的詞目欄另外有標示部首、部首以外的筆劃數佮總筆劃數。
可比：【媠】
部首筆畫 女部 - 部首外9畫 - 共12畫

語音差異欄

一个詞因為地方差異有無仝講法的時，原則上以較常用的做主詞目，其他地區的講法收錄佇「語音差異」，閣再佇詞目頁標示。各方言差異濟少會收寡次常用的佇主詞目內底。
可比：【魚】

詞彙比較欄

一个詞因為地方差異有無仝講法的時，原則上以較常用的做主詞目，其他地區的講法收錄佇「詞彙比較」，閣再佇詞目頁標示。各方言差異濟少會收寡次常用的佇主詞目內底。
可比：【柑仔蜜】

異用字欄

收錄佮彼个詞目意義相仝，毋過文獻有無仝用字的其他詞語。
可比：【尖跤幼手】
異用字 尖骹幼手、尖腳幼手