閩南語的漢字狀況
閩南語佮華語佇語音、詞彙、句法本底就有誠濟差別。又閣因為歷史分化較早，互相之間的精差也誠明顯，書寫方面的問題佮爭議較濟。百外年來通行的每一本詞書，佇咧用字這方面各人有各人的選擇，毋過對「本字」的認定精差並無偌大，學者的考證也沓沓仔累積會當信用的本字。毋過閩南語猶原有誠濟來源不明的字、詞，根本都毋是對漢語來的，造成「有音無漢字」的狀況，致使出現無仝款的用字，閣再無像共通語有統一的文字規範，所以目前閩南語用字的狀況猶原誠無一致。
本辭典用字的類型
佇各種閩南語書寫方式內底，本辭典以漢字為基礎，採用「一音一漢字」。選字的標準按照彼个字的使用現況，才閣根據本典已經定好勢的概念選定用字。大概有下底三種類型：
- 本字
相對「訓讀字」、「借音字」、「新造字」來講。指傳統文獻就已經有的漢字字形，而且意義佮閩南語詞彙仝款有同源關係的用字。可比：表示「香」的phang本字是【芳】、表示「小」的sè本字是【細】。 - 訓讀字
使用詞義仝款的漢字字形，來表現相對應這个詞義的閩南語音讀。就用字來講，是借義無借音，也就是取所用的字形之義，加起去的音讀另外有本字。可比：【人】的字形閩南語讀jîn，表示「人」有另外一个講法是lâng，本字應當做【農】抑是【儂】，毋過本典攏定【人】做用字的書寫標準，所以讀lâng的時陣是訓讀字。可比：【人生】jîn-sing的「人」是本字、【好人】hó lâng的「人」是訓讀字。 - 俗字
1、借音字：指一般民間抑是出自文獻的用字，有的是借某乜漢字的閩南語音讀，直接表達一个音同或者音近毋過詞義無仝的詞彙。可比：【某】閩南語讀bóo，會用得表示「妻子」義。
2、新造字：當當音讀佮詞義攏揣無會當使用的漢字，就愛創造新字。造字原理多數是形聲，其次是會意。可比：表示「爬、攀登」的【𬦰】peh（形聲）、表示「長得高」的【躼】lò（會意）。
替代字說明
非本字的用字，本辭典號做「替代字」，所致頭前所講的「訓讀字」、「俗字」等攏是替代字。佇用字的選擇，本典傾向使用本字，毋過下底幾種情況，就算本字確定，考慮各種原因猶是有可能會放棄本字：
- 本字傷過偏僻，一般大眾誠生疏。可比：表示「耕作之地」的tshân本字是【塍】，毋過本典選擇用【田】字來表示。
- 彼个字的字義佮對應的標準語用字完全仝款，而且是極常用的基本字，用本字顛倒較會造成閱讀困擾的。可比：「人」讀做lâng的本字為【農】抑是【儂】，毋過本典選擇用【人】字來替代。
- 差不多已經約定俗成、使用也誠四常的俗字，僫得改變使用的習慣。可比：表示「宰殺」的thâi本字是【治】，本典選擇使用俗字【刣】來表示。
佇選字這方面，本典希望會用得「望字生音義」，予讀者因為彼字的形抑是音就通聯想著書寫者想欲表達的概念。可比表示「低窪泥濘」的làm有「坔」佮「湳」兩種書寫形式，其中「坔」是會意字，「湳」是形聲字，若是這兩字來比較，本典會選擇用「湳」，因為形聲字的表音功能佮意義的關係較峇。另外閣有一个考量，就是盡量莫造字，欲佇電腦造字是無問題，毋過造字若造太多，會增加共享資源佮學習、流通的阻礙，所致有時陣會就電腦已經有的漢字就好。
推薦用字
教育部分別佇96年佮97年公告「臺灣閩南語推薦用字」計共700字詞，本辭典原則上遵照推薦用字的成果，研定原則請見「臺灣閩南語漢字之選用原則(pdf)」。