常用詞
本辭典收詞，以高中以下學生日常生活中用會著的常用詞佮小部份熟語為主，目前攏總1萬4千外詞，選詞以有臺灣台語特徵的詞形為主。另外濟少收寡各詞書多數已經收錄、閣再伊的釋義或者是詞音對語言教學有路用的臺華共同詞，以及部份流行詞、文化詞、特殊音讀詞，佮詞形內底有替代字致使較會讀毋著去的詞。另外有干焦呈現音讀方便查詢的不成詞單音字3千外條、附錄資料2千外條、干焦提供音讀的臺華共同詞4千外條，攏總1萬1千外條。總共是2萬5千外條。
詞頻
所收的詞目以八本中小型的辭典為預收詞目的詞頻根據，凡若詞頻超過三者，列做預收詞目，才閣照常用原則，考量現此時的使用情況進行篩選佮增補，完成現收詞目。八本辭典分別是：
- 《台日新辞書》東方孝義編（1931），南天書局（1997影印出版）
- 《閩南語國語對照常用辭典》蔡培火編著，正中書局（1969）
- 《現代閩南語辭典》村上嘉英編，天理大學出版（1981）
- 《台灣話大詞典》陳修主編，遠流出版公司（1991）
- 《台華雙語辭典》楊青矗主編，敦理出版社（1992）
- 《分類台語小辭典》胡鑫麟編著，自立晚報文化部（1994）
- 《廈門方言詞典》現代漢語方言大詞典分卷，李榮主編，周長楫編纂，江蘇教育出版社（1998）
- 《臺灣閩南語辭典》董忠司總編纂，國立編譯館主編，五南圖書出版公司印行（2000）
增補
詞目的選定以八本詞書為基礎，進行兩階段的增補，第一次新增自
- 《臺日小辭典》（小川尚義編，國立臺灣圖書館藏本，約二萬五千詞），，由初審人員勾選會用得收錄的詞條，才閣佮預收詞目比對增補。
第二階段根據下底新資料進行增補：
- 《台灣語常用語彙》王育德全集之六，王育德著，陳恆嘉中譯，前衛出版（2002）
- 《臺灣閩南語常用詞辭典調查計畫研究報告》張屏生撰，以高雄腔為依據（2003）
- 《臺北同安腔閩南話語彙稿》張屏生調查，以蘆洲同安腔為依據（1995）
各界提供
為著補足文獻的不足，濟少也收寡由各界所提供的常用詞，經過審查了後陸續增補詞目。
實用觀點
除了以「常用」為優先考量以外，並且對實用的觀點出發，無以詞頻做唯一的考量，濟少收寡下底四類傳統辭典多數無收錄的特定詞：
- 強欲消失去的文化詞。
可比：【抽豬母稅】、【油車間】、【巡查】。 - 新生、流行的現代詞彙。
可比：【核能】、【捷運】、【裝痟的】、【摃龜】。 - 有特殊音讀的詞彙。
可比：【亂彈】讀作lān-thân。 - 詞形內底有替代字，較會誤做文讀的。
可比：【田園】tshân-hn̂g。
單音詞
本辭典所收的單音詞，以會用得單獨使用、獨立成詞為原則，包含佇書面語或者是熟語當中會當單用者，閣再詞綴佮語法詞也當做是單音詞來收錄、解說。
單字會用得獨立成詞的，有佮釋義參例句；無成做「獨立單字詞」的條件的，干焦佇查詢結果的頁面呈現音讀。本辭典認定單字成詞的條件如下：
- 單字本身有單獨的字義，獨立成詞，會用得單獨使用，包括特定動作、具像名詞、量詞、數詞等等。
可比：【食】、【花】、【斤】、【三】。 - 一般無單用，毋過定定佮其他的字、詞結合，構詞性懸，佇構成的複音詞當中猶原有彼个單字的字義。
可比：【窗】（【鐵窗】、【玻璃窗】）、【樓】（【大樓】、【樓頂】）、【桌】（【新娘桌】、【食桌】）。 - 一般無單用，毋過佇成語、俗諺、書面語、專科名詞當中會當單獨使用。
可比：【時】在【三不五時】中獨用、【柑】在【桌頂拈柑】中獨用。 - 詞綴。附加佇詞根的構詞成分，並無詞彙的意義，毋過有語法作用，構詞能力強，有「前綴」、「中綴」、「後綴」三種。
可比：【阿公】之【阿】、【行啊行】之【啊】、【試看覓】之【覓】。 - 語法詞。有獨立意義毋過無單用，會當連接詞彙來成做完整的文句。
可比：「我後日才來。」的【才】表示「再」的意思、「這是我的。」的【的】表示所有格、「已經好矣。」的【矣】表示動作完成、相當華語的「了」。
小稱詞
小稱詞【仔】(á)佇臺灣台語內底誠四常，誠濟詞彙會用得加小稱詞也會當免添，看款所在、看款人的使用習慣。本辭典收詞傾向口語化，所致以常用者做主要的收錄對象，假使有添無添的常用比例差不多是五分平手，按呢就傾向添小稱詞。假使構詞是「單字+【仔】」，彼个單字佇其他的情況之下會當單獨使用者，才會用得當做獨立的單字詞。
時代演進
有寡詞彙雖然佇誠濟本詞書攏有收錄，毋過因為時代演進變做無常用或者是無合時代的，就無收錄。
詞組
部份詞目的性質倚近詞組，應當無收，毋過有寡詞組誠常用，或者是佮共通語的講法無仝款，有呈現的價值者，也會收錄。
可比：【起厝】、【重食】。